Connect with us

Hi, what are you looking for?

អន្តរជាតិ

អាមេរិក កាណដាក អង់គ្លេស ប្រកាសថា​មីស៊ីលអ៊ីរ៉ង់ បាញ់ទម្លាក់យន្តហោះដឹកអ្នកដំណើរអ៊ុយក្រែន

តាមរូបភាពវីដេអូផ្សព្វផ្សាយ​ នៅលើបណ្តាញសង្គម ​បានបង្ហាញថា យន្តហោះ​អ៊ុយក្រែន​ដែលធ្លាក់​នៅអ៊ីរ៉ង់​នោះ គឺដោយសារការបាញ់ទម្លាក់ពីមីស៊ីល ហើយអ្នកដំណើរ​ចំនួន​១៧៦នាក់ នៅក្នុងយន្ដហោះនោះ​បានស្លាប់ទាំងអស់ ។
យន្តហោះអ៊ុយក្រែន​កាលពីថ្ងៃទី៨ បានធ្វើដំណើរចាកចេញពី​អ៊ីរ៉ង់​ទៅកាន់​អ៊ុយក្រែន ប៉ុន្តែ​បានប៉ុន្មាននាទីក្រោយ​មក ស្រាប់តែធ្លាក់​ភ្លាមៗ។ ប្រភពពីអាមេរិកបានបញ្ជាក់ថា ផ្កាយរណប​សម្ងាត់​បានចាប់​បានសញ្ញាមីស៊ីល​បាញ់​ នៅមុនពេលដែលយន្តហោះ​បានធ្លាក់ ។


ទីភ្នាក់ងារព័ត៌មាន New York Times និង CNN តាមរយៈសេចក្តីថ្លែងការណ៍​របស់មន្ត្រី​កាណាដា, អាមេរិក និងអង់គ្លេស​ ដែល​ផ្អែកតាម​ព័ត៌មាន ​ក៏ដូចជា​វីដេអូសម្ងាត់ ​បានបញ្ជាក់ថា ប្រព័ន្ធមីស៊ីលអ៊ីរ៉ង់​ បានបាញ់ទម្លាក់​យន្តហោះ​នោះ។ ករណីនេះ គេអាចសន្និដ្ឋានបានថា អ៊ីរ៉ង់ជាអ្នកបាញ់ទម្លាក់យន្តហោះនេះ ។ នេះបើយោងតាមការផ្សាយរបស់ប្រភព Aljazeera កាលពីព្រឹក ថ្ងៃទី១០ ខែមករា ឆ្នាំ២០២០ ។
ក្នុងការចោទប្រកាន់អ៉ីរ៉ង់ខាងលើនេះ គឺក្រុមស៊ើបការណ៍សម្ងាត់ជាតិអាមេរិក និងកាណាដា បានធ្វើការអង្កេតទៅលើខ្សែវីដេអូមួយ ដែលត្រូវបានគេអះអាងថា បានថតនៅកំឡុងពេល ដែលយន្តហោះអ៊ុយក្រែនដឹកមនុស្ស១៧៦នាក់ បានហោះចេញពីអាកាសយានដ្ឋានអន្តរជាតិ នៃរដ្ឋធានីតេហេរ៉ង់កាលពីម៉ោង ៦៖១២នាទីព្រឹកថ្ងៃពុធ ទី០៨ ខែមករា (ម៉ោងនៅតេហេរ៉ង់)។ នៅក្នុងវីដេអូនោះ គឺជាសកម្មភាពគ្រាប់មីស៊ីលហោះចេញ និងបុកជាមួយវត្ថុនៅលើអាកាស ស្ថិតនៅជាយរដ្ឋធានីតេហេរ៉ង់តែម្តង។
បន្ថែមពីខាងលើនេះ នៅពេលអាជ្ញាធរអ៉ីរ៉ង់ ប្រកែកមិនព្រមប្រគល់ប្រអប់ខ្មៅ នៃយន្តហោះ Boeing 737-800 ឲ្យផ្នែកស៊ើបអង្កេតអន្តរជាតិ វាហាក់កាន់តែធ្វើឲ្យការសង្ស័យកើនឡើងថា គ្រាប់មីស៊ីលអ៉ីរ៉ង់ពិតជាបានបាញ់ទម្លាក់យន្តហោះដឹកអ្នកដំណើរ របស់អាកាសរណ៍អន្តរជាតិអ៊ុយក្រែននោះមែន។
ប្រទេសកាណាដាបានបាត់បង់ប្រជាជនរហូតដល់ទៅ៦៣នាក់ នៅក្នុងការធ្លាក់យន្តហោះអ៊ុយក្រែន នៅអ៉ីរ៉ង់ ហើយនាយករដ្ឋមន្ត្រីកាណាដាលោក ចាស្ទីន ទ្រូដូ (Justin Trudeau) បានអំពាវនាវឲ្យមានការស៊ើបអង្កេតជាក់លាក់លើករណីនេះ ខណៈភ្នាក់ងារស៊ើបអង្កេតរបស់កាណាដាផ្ទាល់ បានជឿជាក់រួចទៅហើយថា យន្តហោះនោះត្រូវបានបាញ់ទម្លាក់ដោយគ្រាប់មីស៊ីលរបស់អ៉ីរ៉ង់។
គួរបញ្ជាក់ថា ក្នុងចំណោមអ្នកស្លាប់ទាំង១៧៦នាក់ មានពលរដ្ឋអ៉ីរ៉ង់ ៨២នាក់, កាណាដា ៦៣នាក់, អ៊ុយក្រែន ១១នាក់,ស៊ុយអែត ១០នាក់, អាហ្វហ្គានីស្ថាន ០៤នាក់, អាល្លឺម៉ង់ ០៣នាក់ និងអង់គ្លេស ០៣នាក់។ ចំណែកឯស្ថានទូតអ៊ុយក្រែនប្រចាំនៅប្រទេសអ៉ីរ៉ង់ ក៏បានអះអាងកាលពីដំណាក់កាលដំបូងថា មូលហេតុនៃការធ្លាក់យន្តហោះមួយគ្រឿងធុន Boeing 737 របស់ក្រុមហ៊ុនអាកាសចរណ៍អន្តរជាតិអ៊ុយក្រែន (Ukraine International Airlines) នៅជាយរដ្ឋធានីតេហេរ៉ង់ របស់ប្រទេសអ៉ីរ៉ង់ គឺមិនមែនជា ដោយសារវាយប្រហារភេរវកម្ម ឬមួយក៏គ្រាប់មីស៊ីលនោះទេ៕

Advertisement

Facebook

អ្វីដែល​គេកំពុងអាន